State Bank of Pakistan ki regulations ke mutaabiq SadaPay wallet mein paisay jama kerwaanay ki pehlay sai tai-shuda limit 50,000 PKR/month hai. Lekin, aap apnay wallet mein paisay jama kerwaanay ki limit ko 400,000/month tak barha saktay hai. Iska tareeka bohat asaan hai, aapko sirf apnay kareebi NADRA E-Sahulat agent pey jaa keh apni biometric verification kerwaani paray gi.
Is asaan verification keh steps ye hain:
1. Apnay kareebi NADRA E-Sahulat agent keh paas apnay original koumi shanaakht card (CNIC) keh saath jayein. Aap apna kareebi agent neechay deeyae gaye link sai talaash kersaktay hain:
*Agar aapki rehayish Karachi, Islamabad ya Lahore mei nahi hai tou ham aap sai darkhwaast kertay hain keh E-Sahulat Franchise jaanay sai pehlay, Franchise ko call ker keh ye pooch lein keh unkai paas bio-metric machine mojoud ha ya nahi. Ye bohat zaroori hai kyun ke machine keh beghair ye verification nahi hosakti.
2. NADRA agent ko batayein keh aap 120 rupaye waali bio-metric verification jo keh fingerprint darj kernay sai hoti hai wo kerwaana chahtay hain.
Agent ko ye zaroor batayein keh aap vo verification chahtay hain jismai fingerprint darj hota hai aur receipt ke end pey barcode aata hai.
Aur fiqar na kerain, jab aap ye verification kerwaayein lein gai tou ham 120 PKR aapkay SadaPay wallet mei waapis refund bhi kerdain gai! 😄
Iss baat ka dehaan zaroor rakhein keh jo verification aap kerwa rahay hain uski receipt bilkul aisi hou jesay neechhay tasveer mein sample receipt hai (receipt keh oopar barcod ka mojoud honaa intehayi zaroori hai!)
Hamaara mushwara ye hai keh aap verification sai pehlay agent ko ye baat clear kerdain keh aap apna fingerprint darj kerwaana chahtay hain. Neechay dee gayi receipt ki tasveer aik dafa dikha dain taa keh agent ko bhi clear hou keh konsi verification kerni hai.
3. Iskay baad agent aapsay aapka koumi shanaakht card (CNIC) maangay ga, aapkay angoothay ka print apni machine mei darj kerwaye ga aur aapko aapki verification ki reciept deydai ga.
4. Jab aapko receipt miljaye tou uspaye diye 19-digit number ko, jo keh barcode keh neechay mojoud hoga, hamaaray saath hamaari app ki chat keh zariye share kerdain. Jesay hi hamaari team ko receipt ka number miljaye ga tou wo verification kerkay aapki limit 1 karobari din mein 400,000 PKR/month tak barha dei gi. 🎉
5. Jab ye process complete hojaye ga tou ham aapko 120 PKR aapkay SadaPay wallet mei waapis refund kerdain gai taa keh iss verification ki cost aapko na bharni paray! 👍🏻